Plantun de Prouvènço

Pèr coumpara dos planto d'encò nostre

Capsella bursa-pastoris subsp. pastoris & Euphorbia characias

Bourso-à-pastre

Capsella bursa-pastoris subsp. pastoris

Brassicaceae Cruciferae

Àutri noum : Erbo-dóu-cor, Erbo-de-l'evangèli, Carnié-de-pastre, Nastou-fèr, Nestoun.

Nom en français : Bourse-à-pasteur.

Descripcioun :
Lou biais lou mai eisa pèr la recounèisse èi de segur si pichot boursèu en formo de cor (l'erbo-dóu-cor) que dounon d'èr i bourso di pastre d'à passa tèms. Coume flouris dins li champ quàsi tout de long de l'annado es eisa de la rencountra. Isto peréu la meno rubella, rouginasso, emé de boursèu un pau mai larg.

Usanço :
La bourso-à-pastre rintro dins la coumpousicioun de l'ensalado champanello, mai tout se manjo dins aquelo planto, di racino i flour. De la meme famiho que la moustardo (Brassicaceae), n'a tambèn un pau lou goust. Li chinés la cultivon coume liéume. Ei couneigudo peréu pèr èstre vertuouso contro li proublèmo de circulacioun dóu sang (cambo lourdo, moureno...).

Port : Erbo
Taio : 5 à 40 cm
Fueio : basalo
Tipe bioulougico : Teroufite
Cicle bioulougico : Planto de l'an

Gènre : Capsella
Famiho : Brassicaceae
Famiho classico : Cruciferae

Ordre : Brassicales

Coulour de la flour : Blanco
Petalo : 4
Ø (o loungour) flour : 3 mm
Flourido : Printèms Autouno - Ivèr

Sòu : Ca
Autour basso e auto : 0 à 1800 m
Aparado : Noun
Remarco : Ensalado champanello
Janvié à desèmbre

Liò : Champ - Ermas - Camin - Escoumbre e proche dis oustau
Estànci : Termoumediterran à Subaupen
Couroulougi : Bourealo
Ref. sc. : Capsella bursa-pastoris subsp. pastoris (L.) Medik., 1792

Lachusclo

Euphorbia characias

Euphorbiaceae

Àutri noum : Chusclo, Jusclo, Lachousclo, Chousclo, Chassugo.

Noms en français : Euphorbe characias, Euphorbe des garrigues.

Descripcioun :
Planto coumuno de nòsti garrigo que pousso en mato bouissounouso que podon faire mai d'un mètre d'aut. Li cambo soun forto e lignouso emé de fueio espesso. La flour a de bèlli glando rouginasso emé de pichòti bano.

Usanço :
Coume tóuti lis meno d'Euphorbia, la lachusclo es uno planto empouisounanto. Lou la que s'escoulo à la coupo èi di proun irritant pèr la pèu, lis iue e la bouco. Pamens, poudès vous n'en servi pèr crema li berrugo. Ei bon peréu pèr sougna li mouchourlo de fedo e de chivau. Lis ancian se n'en servien pèr tua li pèis de ribiero e pèr aganta li passeroun emé lou visc.